लहानघोडी, ता. सुरगाणा, जि. नाशिक | दि. २ ऑक्टोबर २०२६
जिल्हा परिषद प्राथमिक शाळा लहानघोडी, ता. सुरगाणा, जि. नाशिक येथे राष्ट्रपिता महात्मा गांधी जयंती व भारताचे माजी पंतप्रधान लालबहादूर शास्त्री जयंती उत्साहपूर्ण वातावरणात साजरी करण्यात आली.
कार्यक्रमाच्या सुरुवातीस महात्मा गांधी व लालबहादूर शास्त्री यांच्या प्रतिमेचे पूजन करून अभिवादन करण्यात आले. यावेळी उपस्थित विद्यार्थ्यांनी दोन्ही महान राष्ट्रपुरुषांच्या विचारांना अभिवादन केले.
शाळेचे मुख्याध्यापक श्री. देशमुख सर यांनी विद्यार्थ्यांना महात्मा गांधी यांच्या जीवनकार्याची व स्वातंत्र्यलढ्यातील योगदानाची माहिती सांगितली. सत्य, अहिंसा, स्वच्छता, साधेपणा आणि स्वावलंबन या गांधीजींच्या विचारांचे महत्त्व त्यांनी विद्यार्थ्यांना समजावून सांगितले. गांधीजींच्या विचारांचा आपल्या दैनंदिन जीवनात अवलंब करण्याचे आवाहन त्यांनी विद्यार्थ्यांना केले.
तसेच उपशिक्षक श्री. राऊत सर यांनी भारताचे माजी पंतप्रधान लालबहादूर शास्त्री यांच्या जीवनकार्याची माहिती विद्यार्थ्यांना दिली. शास्त्रीजींचा साधेपणा, प्रामाणिकपणा, देशभक्ती आणि राष्ट्रसेवेची भावना याबद्दल त्यांनी मार्गदर्शन केले. “जय जवान, जय किसान” या शास्त्रीजींच्या प्रेरणादायी घोषणेचा अर्थ विद्यार्थ्यांना समजावून सांगितला.
या प्रसंगी अंगणवाडी ताई, शाळा व्यवस्थापन समितीचे अध्यक्ष, पालक तसेच विद्यार्थी उपस्थित होते. विद्यार्थ्यांनी कार्यक्रमात उत्स्फूर्त सहभाग घेतला.
महात्मा गांधी आणि लालबहादूर शास्त्री यांच्या विचारांचे स्मरण करून विद्यार्थ्यांमध्ये सत्य, अहिंसा, स्वच्छता, शिस्त, प्रामाणिकपणा, देशप्रेम आणि सामाजिक बांधिलकी यांसारखी मूल्ये रुजविण्याचा संदेश या कार्यक्रमातून देण्यात आला.
कार्यक्रम उत्साहपूर्ण व प्रेरणादायी वातावरणात पार पडला.
